Amerikanın United Airlines aviaşirkətinin sərnişininə qarşı güc tətbiq edilərək, onu sürüməklə təyyarədən bayıra çıxarıblar. Hadisənin videosunu twitter-dəki öz mikrobloqunda Tyler Bridges adlı istifadəçi yerləşdirib.
The Courier-Journal qəzetinin dəqiqləşdirdiyi məlumata əsasən, hadisə bazar günü aprelin 9-da Çikaqoda, O’Xara beynəlxalq aeroportunda Luisvill şəhərinə (Kentukki) uçuşdan əvvəl qeydə alınıb. Sərnişinlərin hamısı içəri daxil olduqdan sonra, onlara elan olunub ki, təyyarə həddən artıq dolduğu üçün United Airlines-in dörd əməkdaşı üçün yer azad etmək lazımdır.
Əgər onlar bunu könüllü etməyə razılaşacaqlarsa, turistlərə adambaşına 800 dollar məbləğində kompensasiya da təklif ediblər. Lakin heç kim buna razılaşmayıb. Belə olan halda, aviaşirkətin əməkdaşları sərnişinlər arasından dörd nəfəri seçərək, onlardan təyyarənin salonunu tərk etməyi xahiş ediblər. Sərnişinlərdən biri tələbə tabe olmaqdan imtina edib. Nəticədə, təyyarəyə daxil olan üç nəfər mühafizəçi həmin sərnişinin əllərindən tutaraq, onu sürüməklə bayıra çıxarıblar.
İlkin məlumatlara görə, həmin şəxs Luisvilə işə gedən həkim olub. Baş verən insident sərnişinlərin əksəriyyətini şoka salıb. Kentukkiyə nəzərdə tutulan reys iki saat ləngiməli olub.
