Azərbaycanda avtomobillərdən oğurluq edən şəxslər tutulub.
Daxili İşlər Nazirliyinin mətbuat xidmətindən APA-ya verilən məlumata görə, Binəqədi Rayon Polis İdarəsi əməkdaşlarının keçirdikləri əməliyyat-axtarış tədbirləri nəticəsində yanvarın 7-dən aprelin 10-dək olan müddətdə rayon ərazisində 10 avtomobildən akkumulyator oğurlamaqda şübhəli bilinən Bakı şəhər sakini Ceyhun Nurəhmədov tutulub.
Bundan başqa, Gəncə şəhər Kəpəz Rayon Polis İdarəsi əməkdaşlarının keçirdikləri əməliyyat-axtarış tədbirləri ilə ötən il dekabrın 14-dən cari il martın 26-dək olan müddətdə Gəncə şəhəri ərazisində 8 avtomobildən, habelə 13 həyətyanı sahədən akkumulyator, səsgücləndirici, təkər, təmir-tikinti alətləri, məişət əşyaları və 34 ev quşu oğurlamaqda şübhəli bilinən şəhər sakini Elşən Kərimov və fevralın 1-dən martın 27-dək olan müddətdə Gəncə şəhəri ərazisində 8 avtomobildən, habelə 3 həyətyanı sahədən maqnitofon, akkumulyator, səsgücləndiricilər, inşaat materialları və 3 ev quşu oğurlamaqda şübhəli bilinən şəhər sakini Eldəniz Rzayev saxlanılıblar.
