ABŞ-ın Missuri ştatının Kanzas-Siti aeroportunda sərnişin pilota hücum edib. Bu haqda KMBC 9 News məlumat yayıb.
İnformasiyaya görə, Edvard Foster adlı sərnişin American Airlines aviaşirkətinin reysiylə onunla birlikdə Dallasdan (Texasdan) sərnişin qismində uçan pilota hücum edib.
Foster, kimliyi açıqlanmayan pilotu hava limanının çıxışında yaxalayıb. O, pilotu tutaraq yerə yıxmağa çalışıb, həmçinin iki dəfə də itələyib. Pilot isə bu zaman çıxışa doğru atılıb, 49 yaşlı sərnişin isə onu təqib etməyə davam edib.
Zərər çəkmiş əvvəlcə polisə şikayət ərizəsi verməkdən imtina etsə də, sonradan fikrini dəyişib.
İnsidentlə bağlı araşdırmalar nəticəsində Foster deyib ki, guya pilot təyyarədə həddən artıq çox yer tutub və ona hörmətsizlik edib.
Nəticədə, sərnişini pilota qəsdən bədən xəsarətləri yetirməkdə ittiham ediblər.
Məlum olub ki, sən demə hücum nəticəsində pilot ayaqlarından travma alıb və onun bazu önündə (dirsəklə pəncə arasındakı hissə) göy ləkələr əmələ gəlib.
