Avtoreyd.az bildirir ki, adətən qanunu pozanları təqib edən Nyu-York ştatının polisi, deyəsən, bu dəfə özü qayda pozucusu rolunda çıxış etməli olub. Belə ki, Niaqara şəlaləsi yaxınlığında yerləşən avtodayanacaqda, polis patrulu avtomobili hind xoruzunun təqibinə məruz qalıb.
Bu ərazidə artıq bir neçə aydır ki, yaşayan, nə insandan, nə də avtomobildən qorxmayan Cek ləqəbli hind xoruzu, görünür, burada özünü evdəki kimi hiss edir. Cek artıq bir neçə dəfə yolun hərəkət hissəsinə gəzməyə çıxmaqla, avtomobillərin yolunu bağlayıb. Yerli sakinlər bu vəziyyəti kifayət qədər əyləncəli hesab edir və hind xoruzunu Niaqara şəlaləsinin qeyri-rəsmi talismanı olaraq qəbul edir.
