Avtoreyd.az bildirir ki, Yeni Zelandiyadan olan turist Qəraib adalarına aid Sint-Martendəki yerli çimərlik yaxınlığındakı aeroportda təyyarələri müşahidə edərkən həlak olub.
Uçan təyyarədən qalxan hava dalğası qadını yerə yıxıb və o, səkiyə düşərkən başından ölümcül travma alıb.
Dostları ilə birgə Qəraib adalarına gələn 57 yaşlı yeni zelandiyalı qadın, hasara söykənərək Trinidada uçan “Boinq-737” təyyarəsinin havaya qalxdığını müşahidə edən zaman təyyarənin turbinindən püskürən qəfil şiddətli hava dalğası onu yerə yıxıb.
Qadın təcili xəstəxanaya çatdırılsa da, onu xilas etmək olmayıb.
“Culiana” aeroportu Sint-Martenin adasında əsas görməli yerlərdən biridir. Aeroport, çimərliyin düz yaxınlığında yerləşdiyindən, yüzlərlə turist başları üstündən cəmi bir neçə metr yüksəklikdə eniş edən təyyarələri görmək üçün müntəzəm surətdə “Culiana”nın hasarı yaxınlığında toplaşır.
