Tələbələrə nəqliyyatdan istifadə zamanı güzəştlər tətbiq edilə bilər.
Xezerxeber.az-ın məlumatına görə, artıq bununla bağlı təkliflər aidiyyati qurumlara göndərilib.
Tələbə Gənclər Təşkilatları İttifaqının sədri Şahin İsmayılov qısa zamanda təklifə müsbət cavab alacaqlarına ümidvar olduğunu bildirib.
Şahin İsmayılov bildirir ki, bir çox ölkələrdə tələbələrə nəqliyyatdan pulsuz istifadə imkanı verilir və ya onlar gediş haqqının böyük qismindən azad olunurlar. Belə bir təcrübənin Azərbaycanda da tətbiq olunması tələbələrin sosial-məişət şəraitinin yaxşılaşdırılması üçün önəmli irəliləyiş hesab oluna bilər. Onun sözlərinə görə, aidiyyati qurumlar təklifləri qəbul etsələr, artıq yeni tədris ilindən nəqliyyatda güzəştlərin tətbiqinə start verilə bilər.
Şahin İsmayılov sentyabrdan tələbə kartlarının verilməsində yeni mərhələnin başlayacağını vurğulayıb. O, endirim ediləcək obyektlərin siyahısının məhz tələbələrin sorğusu əsasında hazırlandığına diqqət çəkib.
Şahin İsmayılov onu da qeyd etdi ki, tələbə kartlarını almaq istəyənlər universitetlərdə tələbə gənclər təşkilatlarının nümayəndələrinə yaxınlaşaraq kart üçün müraciət edə və bu kartları iki həftə ərzində əldə edərək bir çox yerlərdə endirimlərdən faydalana bilərlər.
