Birini traktor vurdu, digərini vuran sürücü də qaçdı – KÜRDƏMİRDƏ PİYADA FACİƏSİ

Kürdəmirdə piyadanın ölümü ilə nəticələnən yol qəzası baş verib. AvtoReyd.Az APA TV-yə istinadən verdiyi xəbərə görə, hadisə axşam saatlarında Bakı-Qazax magistral yolunun 180-ci kilometrliyində, Kürdəmir rayonunun Karrar kəndindən keçən hissəsində qeydə alınıb.

Şuşa şəhər sakini, 1977-ci il təvəllüdlü Quliyev Süleyman Xasay oğlu idarə etdiyi traktorla yolu keçən piyada, Kürdəmir rayonun Karrar kənd sakini, 1982-ci il təvəllüdlü Rüstəmov Yusif Oqtay oğlunu vurub. Xəsarətləri ağır olan piyada hadisə yerində dünyasını dəyişib. Məlumata görə, Y.Rüstəmov yaxınlıqda işlədiyi restorandan çıxıb evinə gedirmiş.

Kürdəmirdə baş vermiş digər yol qəzası da piyadanın ölümü ilə nəticələnib. Axşam saat 17:00 radələrində Bakı-Qazax magistral yolunun 200-cü kilometrliyində, Kürdəmir rayonunun Qarabucaq kəndindən keçən hissəsində naməlum sürücünün idarə etdiyi avtomobil yolu keçmək istəyən rayonun Xırdapay kənd sakini İsgəndərov Nadir Arif oğlunu vurub. Ağır xəsarətlər alan N.İsgəndərov da təcili tibbi yardım gələnə qədər can verib.

Hər iki faktla bağlı Baş Dövlət Yol Polisi İdarəsinin İstintaq və Təhqiqat Şöbəsində istintaq araşdırmaları aparılır. İkinci hadisəni törədən sürücünün tapılaraq istintaqa cəlb olunması istiqamətində zəruri tədbirlər görülür.

AvtoReyd.Az

http://www.youtube.com/watch?v=bZZYgGKc7qg