Sabirabadda dumanlı hava şəraiti ağır yol qəzasına səbəb olub, nəticədə yeniyetmə ölüb.
Xezerxeber.az-ın məlumatına görə, hadisə Sabirabadın Şəhriyar kəndi ərazisində baş verib. 45 yaşlı Ramiz Abdullayevin idarə etdiyi traktor avtomobillə toqquşub. Nəticədə traktor idarəetmədən çıxaraq aşıb. Hadisə zamanı traktorda olan sürcünün oğlu, 14 yaşlı Rasət Abdullayev aldığı xəsarətlərdən yerindəcə ölüb. Traktorun sürücüsü isə ağır xəsarətlərlə Şirvan Şəhər Xəstəxanasına yerləşdirilib. İlkin məlumata görə qəzaya səbəb dumanlı hava olub. Traktorun sürücüsü əsas yola çıxarkən dumanlı hava səbəbindən yolda hərəkətdə olan avtomobili görməyib və qəza hadisəsi baş verib.
Şəkidə də ölümlə nəticələnən yol-nəqliyyat hadisəsi baş verib. 34 yaşlı Bolludərə kənd sakini Elçin Əhmədov kənd ərazisində avtomobili ilə hərəkətdə olarkən idarəetməni itirib və maşın aşıb. Qəzadan sonra sürücü hadisə yerində ölüb. Avtomobildəki sərnişinlər, rayonun Bolludərə kənd sakinləri – 28 yaşlı İsmayıl Hüseynov, 30 yaşlı Xəyalə Əhmədova və Xəyalənin övladı Həmayə Əhmədova aldıqları müxtəlif dərəcəli bədən xəsarətləri ilə Şəki Rayon Mərkəzi Xəstəxanasına aparılıblar.
Astaradakı qəzada mikroavtobus sərxoş piyadanı vuraraq öldürüb. Hadisə Ələt-Astara magistral yolunun Pensər kəndinin ərazisindən keçən hissəsində baş verib. 44 yaşlı Nahid Əbilovun idarə etdiyi mikroavtobus sərxoş halda olan və yolun hərəkət hissəsinə çıxan Maşxan kənd sakini 48 yaşlı Rafiq Teymurovu vurub. Xəsarət alan Rafiq Teymurov xəstəxanaya aparılarkən yolda dünyasını dəyişib.
Şirvanda isə inəklər qəzaya səbəb olub. İsmayıl İsmayılov yük maşını ilə hərəkətdə olarkən Hacıqabul-Horadiz yolunun Şirvan şəhəri ərazisindən keçən hissəsində qəfldən avtomobilin qarşısına sahibsiz inəklər çıxıb. Yük maşınının altında qalan iki inək tələf olub.
Bütün faktlarla bağlı araşdırmalar aparılır.
