AvtoReyd.Az Fan.Az – a istinadla xəbər verir ki, Britaniyada kiçik bir şəhər sakini Lidieyt Edi Poup adlı xanım, evinin yanından sürətlə şütüyən qayda pozucularına qarşı təkbaşına mübarizə aparmaq qərarına gəlib. O, əlində portativ sürət ölçən kamera tutan polis müqəvvası düzəldib.
Bunun üçün britaniyalı xanıma qadın corabları və bolluca saman lazım olub. Kamera əvəzi isə qara plastik kütlədən düzəldilmiş kanistrdan istifadə olunub.
Polisin müqavvasını düzəltmək ideyası 71 yaşlı təqaüdçü qadının ağlına yaşadığı küçədə ardıcıl olaraq üçüncü dəfə baş verən qəzadan sonra gəlib. Yerli rəhbərlik çətinliklə də olsa bu ərazidə sürət həddinin saatda 100 km-dən 60 km-ə endirilməsinə nail olsa da, sürücülər yol hərəkət nişanına məhəl qoymadan avtomobillərini əvvəlki kimi idarə etməyə davam edirlər.
71 yaşlı nənənin məsələyə yaradıcı yanaşması istənilən nəticəni verib. Belə ki, sürücülər yolda polisin müqəvvasını görən kimi sürəti azaltmalı olurlar. Lakin sürət həddini aşanların heç də hamısı “yol polisindən” qorxmur. Bu yaxınlarda qayda pozucularından biri müqəvvanı kolluğa atıb.
Ancaq Lidieyt Edi Poup qalıqları tez taparaq, Spido adı verdiyi polisi əvvəlki yerinə bərpa edib.
Yerli polislər nənənin “yaradıcılığına” müsbət yanaşıblar. Onlar hesab edir ki, polis formasındakı müqəvva heç bir qanunu pozmur, ümumiyyətlə, sürət rejiminə riayiət olunması ilə bağlı görülən tədbirləri isə yalnız alqışlamaq olar.
