Avtoreyd.az bildirir ki, Avstraliya televiziyasının canlı efirində maye azotla keçirilən sınaq, aparıcı xanım üçün az qalıb ki, acınacaqlı bitsin.
Onuncu kanalda efirə gedən “Studio 10” səhər şousunda fizika müəllimi və bloger Ceykob Striklinq, plastik butulkaları sonradan raket kimi havaya buraxmaq üçün maye azotla doldurub.
Uğurlu sınaqdan sonra Ceykob Striklinq, aparıcı Natarşe Bellinqə “fokus”u onunla birlikdə təkrarlamağı təklif edib. Belə ki, bloger butulkaya maye azotu tökdükdən sonra, aparıcı onun əmri ilə qabı çevirməli idi.
Görünür, aparıcı nə etdiyinin açıq şəkildə fərqində olmayıb.
“Mən bunu iki dəfə təkrarlamışam və siz izləməli idiniz”, – Striklinq belə deyib. “Mən baxmamışam”, – deyən xanım, sonradan butulkanı qəfildən çevirib. Bu zaman maye azot dolu qab, düz onun başının yanından cəmi bir neçə santimetr aralıdan böyük sürətlə keçib.
Aparıcı heç bir xəsarət almasa da, bir müddət qulağı batıb.
Videonu şərh edənlərin hamısı aparıcı və blogeri belə sınaqları keçirməklə həm də öz həyatlarını, həm də ətrafındakıları təhlükə altına aldıqları üçün kəskin tənqid ediblər. İstifadəçilərin demək olar ki, hamısı butulkanın qızı öldürə biləcəyi fikri ilə razılaşıb.
