Restoranda geyimdə olan yeganə insanlar, iki nəfər menecerdir. Onlara da çılpaq şəkildə işləməyə qanun icazə vermir.
Avtoreyd.az bildirir ki, keçmişdə sığorta agentləri olan Mayk və Stefan Saad əkizlər qardaşları, fransız paytaxtının 12-ci dairəsində çılpaq dincəlməyə üstünlük verənlər üçün restoran açıblar. Maraqlısı odur ki, restoran sahiblərinin özləri lüt gəzməyin tərəfdarı deyillər, sadəcə bu yolla qazanc əldə etməyə qərar veriblər.
Artıq diqqət cəlb etməmək və qonşuları narahat etməmək üçün O’Naturel adlı müəssisə bayırdan heç nəylə diqqət çəkmir. Daxildə isə ziyarətçilər üçün soyunma otağı, göy rəngli zal, birdəfəlik qara çexollarla örtülmüş stullar və pəncərələrdə sıx pərdələr var.
Masa arxasına keçməzdən əvvəl, ziyarətçilər ciddi qaydada öz geyimlərini və mobil telefonlarını qarderoba təhvil verirlər.Əvəzində qonaqlara ayaqlarına geyinmək üçün çəkələk verilir. Restoranın qaydalarına əsasən qadınlara dikdaban ayaqqabılarda gəzməyə icazə verilir.
Klassik fransız mətbəxi O’Naturel restoranında orta qiymət təxminən 30 avro təşkil edir. Müəssisə yalnız axşam işləyir və müştərilər əvvəlcədən qeydiyyata alınır. Bundan başqa, restoran sahibləri şübhəli qonaqları, artıq onların sifarişlərinə əsasən aşkar etməyi öyrəniblər. Restoranın internet-səhifəsində iaşə obyektinin qonaqlarının rəyləri ilə tanış olmaq olar. Onu da deyək ki, hazırda hələlik yalnız müsbət fikirlər yer alıb.
Qeyd edək ki, O’Naturel Qərbi Avropada nudistlər üçün üçüncü belə müəssisədir. İlk belə restoran 2016-cı ildə Londonda açılıb və “The Bunyadi” adlanır. 2017-ci ilin yanvarında isə çılpaq qonaqlar üçün restoran İspaniyada, Tenerifedə fəaliyyətə başlayıb.
