LST (Landing Ship Tank) layihəsi çərçivəsində hazırlanan türk istehsalı olan Bayraktar desant amfibiya gəmisi Türkiyənin Hərbi Dəniz Qüvvələrinin ixtiyarına verilib. Məlumatı Anadolu agentliyi yayıb.
Bayraktar, bu layihə çərçivəsində hazırlanan iki gəmidən birincisidir. O, atom, bioloji və kimyəvi hücumlara qarşı davam gətirmək gücündədir. Gəminin uzunluğu — 139, eni — 19,6 metr, su basımı — 7254 tondur. Gəmi 71% türk texnologiyalarıyla təchiz edilib.
Bayraktar sahilə 1,2 min ton yük və ya bir neçə tank, zirehli texnika və digər nəqliyyat vasitələri çatdırmaq iqtidarındadır. Gəmi açıq dənizdə muxtar şəkildə 30 gün müddətində üzə, əlavə yanacaq doldurmadan beş min dəniz mili məsəfəsini qət edə bilər.
İstanbulda gəminin təqdimat mərasimində çıxış edən Türkiyənin Müdafiə naziri Fikri Işık bildirib ki, Türkiyə öz gücü hesabına hərbi gəmiləri layihələşdirən və hazırlayan dünyanın on ölkəsi sırasına daxildir.
