Sankt-Peterburqdakı özəl müəssisələr insanların daşınması üçün pulsuz kömək təklif edib. Bu haqda İTAR-TASS-a şəhər nəqliyyatı üzrə komitənin mətbuat xidmətindən məlumat veriblər.
Metropolitendəki partlayışdan sonra Sankt-Peterburq şəhərinin Pulkovo aeroportunda təhlükəsizlik tədbirləri gücləndirilib.
Sankt-Peterburqda baş verən partlayışdan sonra paytaxt Moskvada da təhlükəsizlik tədbirləri görülüb.
Rusiyanın mobil operatorlarının əksəriyyəti metropolitendə baş verən partlayış səbəbindən, Sankt-Peterburqda rabitə əlaqəsində nasazlıqların yaşanmaması üçün tədbir görüblər.
Peterburq metrosunda partlayış zamanı zərər çəkən şəxslər bir-birinə yardım edib və vəziyyətin daha pisə doğru dəyişəcəyinə hazır olduqlarını deyiblər. Bu haqda İTAR-TASS-a hadisə şahidi danışıb.
“Əgər belə ifadə etmək olarsa vaqonda olan sərnişinlərin hamısı artıq öləcəklərini düşünürdülər.Partlayışdan sonra hamı nəticələri gözləyirdi, sonra bizi təxliyə etdilər və insanlar bir-birinə kömək etməyə başladılar. Başqalarını hadisə yerindən çıxarırdılar, əksəriyyət qan içində idi”, – İTAR-TASS agentliyinin əməkdaşı ilə həmsöhbət olan hadisə şahidi danışıb.
Digər şahid isə qeyd edib ki, təxliyyə olunmalarını onlar bir neçə dəqiqə gözləyib. “Həlak olanları gördüm, ən azı 3-4 nəfər olardı. Təcili xidmət əməkdaşları hadisə yerinə 5-7 dəqiqə sonra gəldi”, – o, belə məlumat verib.
Sankt-Peterburqun qubernatoru Georqi Poltavçenko partlayış baş verən metro stansiyasına gəlib. Stansiyaya yaxınlaşan qubernator, dərhal içəriyə yollanıb. Stansiyanın özü isə polislər tərəfindən mühasirəyə alınıb.
Qubernatorun mətbuat katibi Andrey Kibitov bildirib ki, metrodakı partlayış zamanı 50 nəfərə yaxın şəxs xəsarət alıb. Hadisə yerinə 17 təcili yardım briqadası cəlb olunub.
“Hazırda təxminən 50 nəfər zərər çəkmiş var. Həmin şəxslərlə həkimlər çalışır. Təcili yardım briqadalarının sayı 17-dir, lakin artırılacaq”, – qubernatorun mətbuat katibi Andrey Kibitov belə deyib. Hadisə yerində olan İTAR-TASS agentliyinin müxbiri bildirib ki, zərər çəkənlərin təxliyyəsi üçün həmçinin helikopterlərdən də istifadə olunub.
Rusiya prezidenti Vladimir Putin bildirib ki, Sankt-Peterburq metrosunda baş verən partlayışın səbəbləri hələ məlum deyil. Bütün versiyalar nəzərdən keçirilir. Rusiya dövlət başçısının sözlərinə görə partlayışın məişət zəminində olması versiyası da, terror hadisəsi olması versiyası da istisna edilmir.
Vladimir Putin deyib ki, Peterburqda metroda baş verən partlayış haqqında xüsusi xidmət orqanlarının məruzələri ona təqdim olunub.
Putin əmin edib ki, baş vermiş hadisə ilə bağlı həm hüquq-mühafizə orqanları, həm də xüsusi xidmət orqanları işləyir. Partlayışın səbəblərini aşkar etmək üçün, eyni zamanda baş verən hadisənin dəqiq qiymətləndirilməsi üçün onlar əllərindən gələni edəcəklər.
Rusiya prezidenti partlayış zamanı həlak olanların yaxınlarına və zərər çəkən şəxslərə başsağlığı verib.
Qeyd edək ki, daha əvvəl Rusiya prezidentinin mətbuat katibi Dmitri Peskov bildirmişdi ki, dövlət başçısına baş verən partlayışla bağlı məlumat verilib.
Dmitri Medvedyev də metroda partlayış nəticəsində həlak olanların və zərər çəkənlərin ailələrinə başsağlığı verib.
Avropa Birliyinin 28 ölkəsinin Xarici işlər nazirləri Lüksemburqda keçirilən şura iclasında Sankt-Peterburqdan gələn xəbərləri izlədiklərini bildiriblər. Bu haqda birliyin diplomatiyasının rəhbəri Federika Mogerini məlumat verib.
“Sankt-Peterburqdan gələn xəbərləri Avropa Birliyinin bütün xarici işlər nazirləriylə birlikdə izləyirik. Biz mənən Rusiya xalqının yanındayıq”, – Federika Mogerini belə deyib.
Qeyd edək ki, bu gün Sankt-Peterburq metropoliteninin “Texnologiya institutu” stansiyasında partlayış baş verib. Hazırda metronun bütün stansiyaları bağlanıb.
http://www.youtube.com/watch?v=siFjlAnmba4
Sankt-Peterburq metrosunda iki partlayıcı qurğu işə düşüb.
Partlayış “Sennaya” və “Texnologiya institutu” stansiyalarında baş verib. Hər iki stansiya bağlanıb, sərnişinlərin təxliyyəsi gedir.
İlkin məlumatlara görə, ən azı 10 nəfər insan xəsarət alıb. Xəsarət alanlar arasında uşaqlar da var.
Şahidlər sosial şəbəkələrdə hadisə yerindən fotolar dərc edir.
