İmişlidə minik avtomobilinin aşması ölümlə nəticələnib.
Xezerxeber.az-ın məlumatına görə, ağır qəza İmişlinin Qaralar kəndi ərazisində baş verib. Otuziki kənd sakini Mirxalid Əzizovun idarə etdiyi minik avtomobilinin qarşısına motosiklet çıxıb və maşın yoldan çıxaraq aşıb.
Avtomobildə olan sərnişin Qiyas Əzizov hadisə yerində ölüb. Sürücü və digər sərnişinlər – İmişlinin Soltanmuradlı kənd sakini Könül Əzizli, Otuziki kənd sakinləri – Gültəkin Güləliyeva və Validə Əzizova müxtəlif bədən xəsarətləri ilə İmişli Rayon Mərkəzi Xəstəxanasına yerləşdirliblər.
Rayonun Xoşçobanlı kəndində isə Savalan Bayramovun idarə etdiyi traktor Saatlı sakini Eldar Hüseynovun minik avtomobili ilə toqquşub. Hər iki sürücü və avtomobildə olan sərnişinlər – Babək Allahverdiyev, Məlahət Allahverdiyeva və Samirə Vəliyeva müxtəlif xəsarətlərlə xəstəxanaya yerləşdiriliblər.
Həkimlərin səylərinə baxmayaraq Məlahət Allahverdiyevanın həyatını xilas etmək mümkün olmayıb. Digər yaralılar isə ilkin tibbi yardım göstərildikdən sonra evə buraxılıblar.
Zaqatalada isə yük maşını aşıb. Hadisə səhər saatlarında Yevlax-Zaqatala-Gürcüstan magistralının Tala kəndi ərazisindən keçən hissəsində baş verib. Yük maşınının sürücüsü sükana nəzarəti itirib və nəqliyyat vasitəsi yol kənarındakı divara dəyərək aşıb.
Qəza zamanı xəsarət alan olmasa da, magistral yol 1 saata yaxın bağlı qalıb. Bir müddət sonra maşın yoldan kənarlaşdırılıb və avtomobillərin hərəkəti bərpa edilib. İlkin ehtimala görə, yağışlı havada sürücü qəfildən əyləcə basıb və yük maşını sürüşərək yoldan çıxıb.
Hər üç faktla bağlı araşdırma aparılır.
