Ağcabədi rayonunda 3 nəfərin xəsarət alması ilə nəticələnən yol-nəqliyyat hadisəsi baş verib.
“Report”un Qarabağ bürosunun verdiyi məlumata görə, hadisə Yevlax-Bəhrəmtəpə avtomobil yolunun rayonun Xocavənd kəndindən keçən ərazisində qeydə alınıb.
“Hyundai” markalı minik avtomobili ilə “Ford” markalı avtomobilin toqquşması nəticəsində hər iki avtomobilin sürücüsü – Fariz Musayev və Təyyar Bəşirov, habelə sərnişin Məhəmməd Hüseynov müxtəlif dərəcəli bədən xəsarətləri alıblar.
Yaralılar Ağcabədi Rayon Mərkəzi Xəstəxanasına çatdırılıb. Vəziyyəti ağır olan T. Bəşirov reanimasiya şöbəsinə, F.Musayev isə Travmatologiya şöbəsinə yerləşdirilib. Digər yaralı M.Hüseynov isə ambulator müalicədən sonra evə buraxılıb.
Hadisə şahidlərinin sözlərinə görə, qəzaya səbəb “Hyundai” markalı avtomobilin qarşı tərəfin hərəkət zolağına çıxması olub.
Faktla bağlı araşdırma aparılır.
