Bakıda içi sərnişinlə dolu avtobusun qatarla toqquşması faciəvi hadisəyə səbəb olub.
Xezerxeber.az bildirir ki, 1 nəfərin öldüyü, 34 nəfərin ağır xəsarət aldığı qəza günorta saatlarında paytaxtın Xəzər rayonu Binə qəsəbəsində baş verib.
Məlumata görə, sərnişinlə dolu 160 saylı marşrut avtobusu hərəkətdə olan qatarın yoluna çıxıb. Nəticədə qatar avtobusu vuraraq bir neçə metr sürüyüb.
Hadisə yerinə 10 təcili-tibbi yardım briqadası, polis və xilasedicilər cəlb edilib. Qəza nəticəsində 1 nəfər xəstəxanaya aparılarkən yolda ölüb. Məlumata görə, həmin şəxs 12-13 yaşlı məktəbli olub.
Səhiyyə Nazirliyinin məlumatına görə, 34 yaralıdan 26-sı təcili-tibbi yardım maşınları ilə, 7-si isə özü xəstəxanaya müraciət edib. Yaralılardan 3-ü 1 Saylı Şəhər Kliniki Xəstəxanasına, 2-si Travmotologiya İnstitutuna, qalanları isə 3 saylı Şəhər Kliniki Xəstəxanasına aparılıb. Onların da əksəriyyətinin vəziyyəti ağırdır.
Qəza zamanı qatarda olan maşinist köməkisi Emin Hüseynov həmin anı danışıb.
Hadisə yerinə gələn “Azərbaycan Dəmir Yolları” QSC-nin sədr müavini Əlirza Süleymanov açıqlamasında bildirib ki, avtobus qatarın qarşısına çıxıb. İcazə verilən sürət həddi 40 km/saat olsa da, qatar 30 km/saat sürətlə gəlib. Qatar avtobusla toqquşduqdan sonra relsdən çıxaraq 90 dərəcə sağa dönüb və məntəqəyə çırpılıb.
160 nömrəli marşrut xəttinin daşıyıcısı ”Ayşən” MMC-nin dispetçeri Zabil Hüseynov bildirib ki, şlaqbaum açıq olduğundan avtobus relsdən keçib”Avtobusun sürəti aşağı olub. Hər şey araşdırmadan sonra dəqiq bilinəcək”.
Bu arada, avtobus qəzası ilə bağlı cinayət işi başlanıb. Dəmir Yolu Nəqliyyatında Polis İdarəsində Cinayət Məcəlləsinin yol hərəkəti qaydalarını pozma – ehtiyatsızlıqdan zərərçəkmiş şəxsin ölümünə səbəb olduqda maddəsi ilə cinayət işi başlanıb, müvafiq ekspertizalar təyin edilib. Hazırda hadisənin baş vermə səbəblərinin müəyyənləşdirilməsi istiqamətində istintaq hərəkətləri davam etdirilir.
Mövzu ilə bağlı daha ətraflı videomaterialı təqdim edirik:
