Bayram günlərində ölkə ərazisində qeydə alınan yol-nəqliyyat hadisələrinin statistikası açıqlanıb. Qəzalarda ölən və yaralananların sayı ötən ilin müvafiq dövrü ilə müqayisədə dəfələrlə azalıb. Baş Dövlət Yol Polis İdarəsi bayram tətilindən qayıdan sürücülərə də müraciət edib.
Bayram günləri yol qəzalarında 6 nəfər ölüb, 32 nəfər xəsarət alıb.
Bu barədə ”XəzərXəbər”ə Baş Dövlət Yol Polisi İdarəsinin şöbə rəisi Kamran Əliyev deyib. Onun sözlərinə görə, ötən ilin müvafiq dövrü ilə müqayisədə bu il qəzalarda ölüm faktı 13 dəfə azalıb.
Şöbə rəisi Kamran Əliyev onu da bildirdi ki, bayram günlərində baş verən qəzaların çoxu piyada vurulması ilə bağlıdır. Yəni 25 yol-nəqliyyat hadisəsindən 14-də piyada vurulub. Baş Dövlət Yol Polisi İdarəsinin əməkdaşları bu günlərdə təhlükəsizliyi təmin etmək üçün mütəmadi reydlər də keçirib.
Baş Dövlət Yol Polisi İdarəsi bu gün tətildən qayıdan sürücülərə də müraciət edib. Yola çıxmazdan əvvəl mütləq normal yuxu almaq və səhər saatlarından yola çıxamq tövsiyyə edilir.
Özünü və yaxınlarını düşünənlər məsləhətlərə əməl etməlidir.
