Bakıda qəfildən başlayan yanğın 51 avtomobili kül edib.
Xezerxeber.az-ın məlumatına görə, hadisə günorta saatlarında paytaxtın Nizami rayonunda, Baş Dövlət Yol Polisi İdarəsinin 11-saylı cərimə meydançasında baş verib.
Cərimə meydançasının əməkdaşları quru otluqda yanğını görən kimi ”112-zəng xidməti”nə məlumat veriblər. Amma bütün bunlara baxmayaraq alov tez bir zamanda cərimə meydançasında olan avtomobillərə keçib.
Bir avtomobildə başlayan yanğın zəncirvari olaraq düz 51 avtomobilə yayılıb. Hadisə yerində Nizami rayon Dövlət Yanğından Mühafizə Hissəsinin bir neçə avtomobili və canlı qüvvəsi cəlb əedilib.
Yanğının qarşısı təxminən 40 dəqiqəyə lokalaşdırılıb. Digər avtomobillər və yaxınlıqdakı tiklilər alovdan qorunub.
Hadisə yerində bütün cəhdlərimizə baxmayaraq çəkiliş aparmağımıza isə polis əməkdaşları mane oldular.
Fövqəladə Hallar Nazirliyindən verilən məlumata görə, hadisə zamanı xəsarət alan olmayıb. Hazırda yanğının baş vermə səbəbləri araşdırılır.
Daxili İşlər Nazirliyindən verilən açıqlamada isə bildirilib ki, yanğın cərimə meydançasında deyil, istismar müddəti bitmiş yararsız avtomobillərin yığıldığı ərazidə baş verib.
Mövzu ilə bağlı daha ətraflı videomaterialı təqdim edirik:
